Бэс ыйын 1 күнэ – Арассыыйа үрдүнэн оҕо көмүскэлин күнэ бэлиэтэнэр. Атын дойдуларга Норуоттар икки ардыларынааҕы оҕо күнүнэн ылыналлар. Оҕо күнэ былыргы бырааһынньыктартан биирдэстэрэ. Бу бырааһынньыгы бэлиэтиир туһунан быһаарыыны 1925 сыллаахха оҕолор үтүө туруктаах буолууларыгар анаммыт
Аан дойдутааҕы кэмпириэнсийэҕэ ылыммыттар.
Оҕо күнүн бэлиэтээн, бэс ыйын 1 күнүгэр үөрэ-көтө Хомустаах 2-с нэһилиэгэр МДКиС дьиэтигэр «Оҕо көмүскэлин күнэ» бэрт сэргэхтик ааста. Бырааһынньыгы тыа сирин түөлбэтин баһылыгын эбээһинэһин толорооччу — Петр Дьулустаанович Васильев уонна «Хомус» уһуйаан салайааччыта Анисья Афанасьевна Протопопова үөрүүлээхтик эҕэрдэлээн, кырачаан кыргыттар «Сибэкки» үҥкүүтүн үҥкүүлээн арыйдылар. Үөрүүнү — көтүүнү ырыанан киэргэттилэр: Егоров Кирилл, Доминика Новгородова, Айсуллуу Осипова, Милианна Егорова. Эҕэрдэ ырыа үҥкүү кэннэ «Төрөппүт оҕотунаан» түөлбэнэн көрдөөх күрэх буолла. Үс түөлбэ көхтөөх кыттыыны ылла. Көрдөөх эстафетаҕа ыһыы-хаһыы ырааҕынан, үөрүү-көтүү муҥура суох буолла. Түмүккэ: 1-кы миэстэ – «Чагда» түөлбэ салайааччы Ефимова Екатерина Леонидовна, 2-с миэстэ – «Сайдам» түөлбэ салайааччы Богатенкова Анастасия Семеновна, 3-с миэстэ – «Сатас» түөлбэ салайааччы Потапова Варвара Петровна. Түөлбэлэр бары грамотанан уонна бирииһинэн наҕараадаланнылар. Көрдөөх эстафета кэннэ сылын аайы ыытыллар «Үрүҥ Уолан 2026» оскуолаҕа киириэн иннинээҕи саастаах оҕолорго многоборье күрэҕэ буолла. Күрэххэ Винокуров Айысхан, Герасимов Ваня, Аргунов Артемий, Алексеев Сандал кытыннылар. Күрэх 6 түһүмэхтээх бэрт тыҥааһыннаах буолла. Ол түмүгүнэн 4-с уонна 3-с миэстэ буоллулар — Алексеев Сандал уонна Герасимов Ваня, 2-с миэстэ — Винокуров Айысхан, 1 -кы кылаан кыайыылаах «Үрүҥ Уолан 2026» аатын ылла – «Аргунов Артемий». Кыайыылаахтар бары грамотанан, мэдээлинэн уонна нэһилиэк тутаах тэрилтэлэрэ туруорбут сыаналаах бириистэрин туттулар. Ити курдук, оонньуу-көр аргыстаах оҕо саас ааһыахтаах, диэн сирдьиттээх оҕо көмүскэлин күнэ кэлбит оҕолорго эмиэ умнуллубат биир кэрэ түгэни бэлэхтээтэ. Бу күнтэн сиэттэрэн оҕолорбут барахсаттар эйэлээх, сырдык халааҥҥа олороллоругар баҕа санаабыт улахан. Хас ыал аайы оҕо саҥата чугдаардын, хас биирдии оҕо мичээрэ таптал уйатын дьолунан толордун! Күндү оҕолорбут, төгүрүччү көмүскэллээх, бары өттүнэн сайдыылаах, киэҥ билиилээх, чэгиэн туруктаах, чөл өйдөөх-санаалаах буола улаатыҥ!
