Сэтинньи ый 4 күнүгэр модун Арассыыйа үрдүнэн Сомоҕолоһуу күнэ 2005 сылтан дойду бэрэсидьиэнин уурааҕынан бэлиэтэнэр буолбута. Саха сиригэр 100-тэн тахса араас норуот олороро биллэр. Сомоҕолоһуу күнэ – Ийэ сирбит инники кэскилин туһугар үрдүк эппиэтинэс уонна эр санаа холобурунан буолар. Модун Арассыыйабыт, Сахабыт сирин, улууспут, нэһилиэкпит туһугар киэн туттуу, кини инники сайдыытын туһугар биир сомоҕо буолан үлэлиир-хамсыыр – биһигини барыбытын ситимниирин, түмэрин умнуо суохтаахпыт!
Сэтинньи ый 1 күнүгэр Сомоҕолоһуу күнүн чэрчитинэн Александра Афанасьевна Находкина суруйуутунан «Симэлийбэт, сэнэниллибэт, суураллыбат туһугар» — минииспиктээкил буолла. Испиктээкили туруорда «Сэргэлэх» сынньалаҥ киинин уус-уран салайааччыта Мария Анатольевна Иванова. Испиктээкил ис хоһоооно Саха киһитэ сахалыы төрөөбүт тылынан, этэн-тыынан иһэригэр, сайдыылаах буоларыгар, төрөөбүт тылынан көҥүллүк сайа саҥарарыгар анаан туруорулунна.
Хас биирдии Саха сирин олохтооҕо нэһилиэгин, улууһун, республикатын, дойдутун туһугар тус кылаатын киллэрэр, хас биирдиибит сайдыы суолун тобулар общественнай олоххо көхтөөх буолуутун ситиһэр, сүрүн соруктары туруоран, биир санаанан салайтаран түмсүүлээх буоллахпытына- кыайтарбаты кыайыахпыт, ситиһиллибэтэҕи ситиһиэхпит диэн Ил Дархан кэскиллээх этиитэ биһигини үтүөҕэ-үрдүккэ кынаттыыр! Испиктээкил кэннэ оскуола оҕолоругар анаан «Бары биир Сомоҕо» — өй, толкуй оонньуутун олохтоох библиотекара Елена Васильевна ыытта. Оҕолор «Универсам» уонна «Едины» диэн ааттанан, икки командаҕа арахсан күөн көрүстүлэр. Күрэх түмүгүнэн «Едины» команда кыайыылааҕынан тахсан анал бирииһинэн наҕараадаланна.
