Алтынньы 29 күнэ — хас да көлүөнэ дьон өйүгэр-санаатыгар уруккутун курдук Сэбиэскэй Сойуус ыччатын саамай халыҥ түмсүүлээх тэрилтэтин — Комсомол төрөөбүт күнэ.
Алтынньы 30 күнүгэр “Сэргэлэх” сынньалаҥ кииҥҥэ “Алгыс” аҕам саастаах түмсүү, олохтоох киин библиотека уонна култуура үлэһиттэрин көҕүлээһиннэринэн ыаллыы сытар Уус-Алдан нэһилиэктэрин Баатаҕай уонна Тумул комсомолецтарын ыҥыран Комсомол төрүттэммит күнэ өрө көтөҕүллүүлээхтик ыытылынна. Дьыл-хонук ааһан истэҕин аайытын билиҥҥи аҕам саастаах көлүөнэ үлэлээн ааспыт кэрчик кэмин күндүтүк саныыр.
Комсомол мөлүйүөнүнэн уолаттарга уонна кыргыттарга улахан олоххо путевка биэрбит тэрилтэ быһыытынан өйдөбүллээх хаалбыт. Кини ыччаты иитиигэ киллэрбит кылаата тугунан да кэмнэммэт.
Ыччат Бүтүн Сойуустааҕы Ленинскэй Коммунистическай Сойууһа, ол эбэтэр Комсомол,
1918 с. алтынньы 29 күнүттэн — 1991 с. сэтинньи 6 күнүгэр диэри үлэлээбитэ. 14-28 саастаах бастыҥ үөрэхтээх, үлэлээх ыччат киирэр уопсастыбаннай тэрилтэтэ сэбиэскэй көлүөнэ дьон сүрэҕэр чугас. Сырдыкка угуйбут, үтүөҕэ сирдээбит Комсомол албан аатыгар кинилэр сүгүрүйэллэр. Гражданскай уонна Аҕа дойду сэрииилэрин дьоруойдарын бойобуой суоллара, хорсун-хоодуот быһыылара үтүө холобур буолан ыччаты дойдуга бэриниилээх, эппит тылы кэспэт, албыннаабат, уорбат-талаабат, ыарахантан чаҕыйбат, кыраҕа-кыаммакка көмөлөһөр эйэҕэс майгылаах буоларга иитэллэрэ, ыраас, сырдык санаалаах, кэскиллээҕи ыралыыр дьон буолан тахсарга олук уураллара.
«Эн, Комсомол – Мин дьолум» тэрээһин торжественнай чааһыгар комсомоллар монтаж аахтылар, музыкальнай эҕэрдэлэрин тиэртилэр. Баатаҕай нэһилиэгин библиотекара Августина Пермякова библиотекардарга «Республика чулуу дьоно» — Николай Тарскай кинигэтин бэлэхтээтэ.
70-80 сыллардааҕы комсомолецтар, олохтоох библиотекарьбыт Елена Васильевна ыыппыт
«Өркөн өй» биктэриинэтигэр илин — кэлин түһүстүлэр. Дьүүллүүр сүбэ быһаарыытынан
Тумул «Төлөн» комсомольскай бөлөҕө- 1 миэстэни, Баатаҕай хамаандата -2 миэстэни,
2 Хомустаах хамаандата-3 миэстэни ылла.
Тумул «Төлөн» комсомольскай бөлөҕө истиэнэ хаһыатын, комсомол кинигэлэрин, оччотооҕу Ленинскэй комсомол значоктарын коллекциятын, комсомол атрибутикатын быыстапка туруордулар. Комсомоллар салгыы спортивнай күрэхтэргэ: дартска, корнхолга, эстафетаҕа олус көхтөөхтүк кытыннылар, түмүккэ: 2 Хомустах -1 миэстэ, Баатаҕай-2 миэстэ,Тумул-3 миэстэ буоллулар. Хамаандаларга грамоталар, өйдөбүнньүктэр туттарылыннылар. Бу тэрээһиҥҥэ ыраахтан кэлэн кыттыбыт ыалдьыттарга махтанан туран, баһылыкпыт солбуйааччыта Сергей Саввич Никонов нэһилиэк библиотекаларыгар дойдубут 2 Хомустах краеведческай-историческай кинигэтин бэлэх уунна. Сынньалаҥҥа көхтөөх оонньуулар, үҥкүү-битии буолла. Кыайыылаахтарга анал грамоталар, бэлэхтэр туттарылыннылар.Тэрээһин кэнниттэн олохтоох библиотекаҕа, нэһилиэк музейыгар экскурсия буолла. Кыайыы скверигэр «Аалай уоттаах чүмэчим» диэн Кыайыы 80 сылынан өйдөбүнньүк чүмэчи уматан уурулунна. Кэлбит ыалдьыттар тэрээһинтэн астынан, үөрэн-көтөн тарҕастылар.
