Саха Республикатын Ийэлэрин уонна Аҕаларын күнүн чэрчитинэн араас хабааннаах тэрээһиннэр ыытылыннылар. Ол курдук Намкоммунтеплоэнерго тэрилтэ Иккис Хомустаах производственнай учаастагар өр сылга үлэлээбит бэтэрээн үлэһиттэригэр Жирков Дмитрий Афанасьевичка, Чекунсо Николай Викторовичка, Захаров Александр Семеновичка уонна Никитин Дмитрий Дмитриевичкэ сэмэй бэлэхтэрин продуктанан туттардылар. Алтынньы 16 күнүгэр ийэлэргэ аналлаах тэрилтэлэринэн көрдөөх эстафета ыытылынна. Эстафета 7 көрүҥ этаптаах ыытылынна.
I миэстэ- Балыыһа коллектива, II миэстэ – Е.П.Сивцев аатынан оскуола коллектива,
III миэстэ – «Хомус» уһуйаан, IY миэстэ – олохтоох администрация буоллулар.
Кыайыылаахтар анал грамотанан, минньигэс бирииһинэн наҕараадаланнылар.
Нэһилиэк эр дьоно кэккэ ыйытыыларга эппиэттээн «Ийэ баар буолан бу сиргэ» истиҥ эҕэрдэ видео уһуллан нэһилиэккэ куйаар ситиминэн тарҕанна.
Алтынньы ый 18 күнүгэр күнүс 14ч.00м. «Күбэйэ» дьахталлар түмсүүлэринэн сылын аайы ыытыллар «Гараж-Сейл» чэпчэки сыанаҕа атыы-кутуу буолла. Бу күн киэһээ 20ч.00м. түөлбэлэр икки ардыларынан «Ийэ оҕотунаан» куонкурус ыытылынна. Куонкуруска «Сайдам» түөлбэттэн
Анастасия Богатенкова уолунаан Витялыын уонна «Сатас» түөлбэттэн Варвара Потапова кыыһынаан Кариналыын кытыннылар. Куонкурус 5 этаптан турда.
Ол курдук 1 этап: Бэйэни билиһиннэрии,
2-с этап «Выставка-хобби», 3-с этап: «Творческий этап», 4-с этап «Пазл таҥыы»,
5-с этап «Тугу таҥнабыт» — таҥас көрүҥүн көрдөрүү.
Дьүүллүүр сүбэҕэ киирдилэр: Афанасий Семенович Охлопков, Вячеслав Афанасьевич Протопопов уонна Петр Дмитриевич Назаров буоллулар. Түһүмэхтэр аайы 5-тии баалы ылан Варвара Потапова кыыһынаан Кариналыын «Сатас» түөлбэ кыайыылааҕынан таҕыста. Куонкурус кыттыылаахтара Добун суругунан уонна сыаналаах бирииһинэн наҕараадаланан үөрэн-көтөн тарҕастылар.
