Балаҕан ыйын 20 күнүгэр Улуу Кыайыы 80 сылыгар аналлаах нэһилиэкпитигэр «Улуу Кыайыы уонна көлүөнэлэр ситимнэрэ» сылларыгар аналлаах «Үүнэ-сайда тур-тапталлаах Торуойум» диэн үгэскэ кубулуйбут Нэһилиэк күнэ ыытылынна. Бу күн эбиэт иннинэ ханнык баҕар норуокка, ханнык баҕар дойдуга, улууска нэһилиэккэ киэн туттар дьонноох буоламмыт үйэттэн-үйэҕэ кэлэр кэнчээри ыччакка хаалан, ол дьоммут үтүө ааттара ааттанан, умнуллубакка уостан-уоска сэһэргээн, кэпсээн үйэтитэн нэһилиэкпитигэр баар үс уулусса биллэр дьоммут: Николай Петрович Габышев; Евсей Павлович Сивцев; Петр Петрович Назаров ааттарынан Куйаар куодтаах табличкаларын оҕолоро: Евсей Павлович Сивцев улахан уола Руслан Евсеевич, Петр Петрович Назаров улахан кыыһа Вера Петровна, нэһилиэкпит ытыктанар киһитэ Петр Егорович Тарскай уонна баһылыкпыт солбуйааччыта Сергей Саввич Никонов үөрүүлээх быһыыга-майгыга тыл этэн, эҕэрдэлээн арыйдылар. Салгыы «Күһүҥҥү киһи күлбүтүнэн» нэһилиэк дьаарбаҥката, «Көмүс күһүн-мин дойдубар» түөлбэлэринэн фотозона күрэҕэ, күнүс 15ч.00м көлүөнэнэн «Волейбол» күрэхтэрэ буоллулар. Түөлбэлэринэн фотозона күрэҕэр: 1-кы миэстэ «Дьулуур» түөлбэ; 2-с миэстэ «Сайдам» түөлбэ, 3-с миэстэ «Сатас» түөлбэ буоллулар. Кыттыбыт түөлбэлэргэ уонна кыайыылаахха кубогынан добун суруктар туттарылыннылар. Көлүөнэнэн «Волейбол» күрэҕэр оскуола оҕолоро икки команда туруораннар уонна «Илин Мыраан» эдэр ыччат командата буолан оонньооннор: Оскуола оҕолорун иккис командата 1-кы миэстэни ылла, бастакы командата 2-с миэстэни ылла, «Илин Мыраан» эдэр ыччат командата 3-с миэстэни ылла. Кыайыылаахтар бары грамотанан уонна мэдээлинэн наҕараадаланнылар. Киэһэ 20ч.00м эҕэрдэ кэнсиэрт буолла. Нэһилиэк күнүгэр бары кыттыбыт дьоммутугар-сэргэбитигэр барҕа махталбытын тиэрдэбит.
