Балаҕан ыйын 12 күнүгэр «Сэргэлэх» сынньалаҥ киинэ үлэтин сезона арыллан, Осипова-Алексеева Александра Федотовна 100 – сылын бэлиэтиир ахтыы күнэ уонна «Сатабыллаах кийииттэр» күрэх диэн тэрээһин буолла. Маннык үтүө үгэс, олохтоммута наһаа улахан суолталаах. Осиповтар — дьиэ кэргэн бу иннинэ, аҕаларын Афанасий Авксентьевич Осипов 100 – сылын бэлиэтээбиттэрэ. Бу курдук дьиэ — кэргэн, төрөппүттэригэр махтанан, сүгүрүйэн, тапталларын туоһута бу буоллаҕа. Оҕолоругар, сиэннэригэр, кэлэр көлүөнэ ыччаттарыгар үтүө холобур салгыы бара туруо турдаҕа. Александра Федотовна 2 — Хомустаахха, Уус — Алдан Тумулуттан, кийиит буолан сүктэн кэлэн, Осиповтар аҕа — уустарын тэҥитэн,олорон ытык иэһин толорон, оҕолоро, сиэннэрэ аҕаларын, ийэлэрин олохторун, салгыы олоххо бигэтик бэйэлэрин суолларынан, айа — тута үөрэнэ, үлэлии сылдьаллара дьону үөрдэр. Ахтыы кэннэ наһаа үчүгэй ис хоһоонноох, улахан кыыһа Александра Афанасьевна идеятынан «САТАБЫЛЛААХ КИЙИИТТЭР» — диэн күрэх буолан дьону сэргэхситтэ. Манна кийиит буолбут Максимова Лена Андриановна – алта араас омук аһын астаан аҕалан сөхтөрдө, Потапова Ньургустаана Петровна – кылтан хатан оҥоһуллубут араас сэлээппэлэри, бейсболкалары, тюбетейкалары выставкалаан киэргэтэн ону таһынан минньигэс тордунан, «Күһүҥҥү киһи күлбүтүнэн» диэн консервирование салат көрүҥнэрин аҕалан көрдөрдө. Иванова Мария Анатольевна «Осенняя муза» диэн бүлүүдэтин, Попова Саргылана Семеновна – «Саха ыала» диэн ырыа доҕуһуоллаах саха бүлүүдэлэрин буһаран аҕалан дьүүллүүр сүбэҕэ көрдөрөн күндүлээтилэр. Кыттааччылар бары анал ааттарынан, сертификаттарынан наҕараадаланнылар. Бу тэрээһин ис хоһооно барыта арыллан, ахтыылар, хаартысканан стиэндэлэр, «Мин манна эргиллэн кэлиэҕим», «Уоннаах тоһоҕо», «Арыттаах хотоҥҥо» — диэн Дьокуускай куорат Эдэр Көлүөнэ театрын артыыстара, Осипова – Алексеева Александра Федотовна олоҕуттан уһуллубут видеороликтар көрдөрүллэн барыта олус долгутуулаах, кэрэхсэбиллээх, холобур буолар тэрээһин сыалын — соругун ситтэ. Александра Афанасьевна, Осиповтар дьиэ кэргэттэрин оҕолоругар, сиэннэригэр, кыттыбыт кийииттэргэ көрөөччүлэргэ, күүс — көмө буолбут кулууп үлэһиттэригэр барҕа махталын тиэрдэн олус долгутуулаах тэрээһин ааста.
