Өбүгэ дьоммут аҕыс ыйдаах адаҕыйан турбут кыһыны этэҥҥэ туораан, күөххэ үктэммит үөрүүлэрин Ыһыах ыһан көрсөр үтүө үгэстээхтэр. Ол сиэр-майгы быһыытынан дойдуга Арассыыйа норуоттарын сомоҕолоһууларын,
Саха Өрөспүүбүлүкэтигэр култуура, Саха сирин уһулуччулаах государственнай уонна политическай деятелэ
И.Е. Винокуров төрөөбүтэ 130, ССРС суруйааччыларын Союһун чилиэнэ, Саха АССР култууратын үтүөлээх үлэһитэ, олоҥхоһут П.П. Ядрихинскай – Бэдьээлэ төрөөбүтэ 125 сылыгар аналлаах «ӨКСӨКҮ КЭРЭТИН ҮӨСКЭППИТ ЭҤСИЭЛИ ХОЧОТО, УРУЙДАН!» Нам улууһун Үрүҥ Тунах ыһыаҕар бэс ыйын 21 күнүгэр Эҥсиэли хочобут кэрэ айылҕатыгар чороон айаҕы чуоҕутан, кэриэн иһити кэккэлэтэн, Алгыс иҥэринэн, самаан сайыны көрсөр Үрүҥ Тунах Ыһыах ыһылынна. Бу күн биһиги Хомустаах 2-с нэһилиэгиттэн «Сэргэлэх» НАДЬ үлэһиттэрэ оһуохай күрэҕэр оҕобут Слепцов Алмаз 12 саастаах уонна Протопопова Марфа Егоровна кыттан дьон биһирэбилин ылан бэйэбит олохтоох дьаһалтабыт уонна «Сэргэлэх» дьиэтэ туруорбут анал бириистэринэн наҕараадаланан үөрүүлэрэ үксээтэ.
«Хомус Иэйиитэ» улуустааҕы хомус тардыытыгар «Дьиэрэй» фольклорнай бөлөх «Төрүт дорҕоон» күөн күрэскэ кыттан 3000 сууммалаах сертификатынан наҕараадаланнылар. Салайааччы Попова Саргылана Семеновна. «Сэргэлэх» дьиэтин директора Чемпин Василий Николаевич 2-с Хомустаах аатыттан 75 киилэҕэ мас тардыһыы күрэҕэр күрэхтэһэн абсолютнай чемпион аатын ылан Нам улууһун мас тардыһыытын федерациятын председателин Петр Эверстов туруорбут бирииһинэн «Убаһа биир чиэппэринэн» наҕараадаланна. Манан көрөн эттэххэ сылын ахсын кыттааччыларбыт ахсааннара элбээн иһэрэ киһини астыннарар. Хас биирдии нэһилиэк бу курдук биирдии-иккилии да буоллар кыра оҕолору бэлэмнээн аҕалаллара буоллар оһуохайбыт кэлэр кэскиллээх буолуо этэ. Орой – мэник оонньуубут оһуохайбыт үҥкүүтэ, уостан түспэт оҥоһуута, хоммут уоһу хоннорон, аһа баттаан айхаллаан үйэлэри куоһурдун диэн алгыс тыла эттэхпит буоллун! Улууспутугар Ыһыахпыт тэрээһиннээхтик, түмсүүлээхтик барбытыгар улуус дьаһалтатыгар, култуурабыт үлэһиттэригэр, успуорду тэрийээччилэргэ барҕа махталбытын тиэрдэбит, этэҥҥэ буолууну кэрэһэлиибит.
