Аҕа дойдуну көмүскүүр сэриигэ бастыҥтан-бастыҥ 117 эр санаалаах, хорсун-хоодуот уолаттара, Ийэ Дойду көҥүлүн уонна тутулуга суох буолуутун туруулаһа, көмүскүү, ытык иэстэрин толоро аттаммыттара. Кинилэртэн сэрии толоонугар геройдуу охтубут — 58 буойун, ол иһиттэн сураҕа суох сүппүттэр 22 буойун кыргыс хонуутугар көмүс уҥуохтара хаалбыттара. Кыайыыны уһансан төрөөбүт дойдуларыгар Кыайыы кынаттаах 59 буойун эргиллэн кэлбиттэрэ.
Сүһүѳхтээх бэйэбит сүгүрүйэн, ахтан-санаан аастыбыт Кыайыы иһин кыргыспыт албан ааттаах буойуннарбытын, күнү – дьылы аахсыбакка күүрээннээх үлэлэринэн өстөөҕү кыайыыга күүс – көмө буолбут, сут – кураан сылларга фронт туһа диэн хоргуйалларын да умнан туран үлэлээбит, кып – кыракый хаалбыт оҕолорун, кыаммат кырдьаҕастарын ииппит, тыыннаах хаалларбыт, сэрии тыаһын истибэтэллэр да, холооно суох хорсун быһыыны көрдөрбүт тыыл ветераннарын.
Буойуннар албан ааттарын, гражданскай эр санааланыыны бэлиэтиир норуот бүттүүнүн бырааһынньыгынан — Улуу Кыайыы 81 сылынан эҕэрдэлээтилэр тыа сирин түөлбэтин баһылыгын солбуйааччы – Сергей Саввич Никонов, тыа сирин түөлбэтин баһылыгын эбээһинэһин толорооччу — Петр Дьулустаанович Васильев, «Алгыс» аҕам саастаахтар түмсүүлэрин салайааччыта Надежда Ивановна Сивцева, Е.П.Сивцев аатынан оскуола оҕолорун ааттарыттан эҕэрдэлээтэ 11 кылаас выпускницата Кэскилээнэ Ширяева. Ол курдук оҕолор бэйэлэрэ илиинэн оҥорбут оҥоһуктарын «Кыайыы Мишкатын» кэлбит кырдьаҕастарга бэлэх туттардылар.
Биһиги геройдарбытыгар, кыайыы иһин сэрии толоонугар тыыннарын толук уурбут буойун саллааттарбытыгар ытыктабылларын биллэрэн гирлянда уурдулар 11 кылаас выпусник уолаттара.
Сут – кураан сылларыгар, тыылга, дойдуларыгар хаалбыт дьон, үксэ дьахталлар,
оҕолор Улуу Кыайыыны уһансыбыттарга, дьоллоох оҕо саас туһугар хорсуннук охсуспут
сэрии – тыыл ветераннарын ис сүрэхтэн «Что такое Победа?» литературнай ааҕыынан эҕэрдэлээтилэр Е.П.Сивцев аатынан орто оскуола 4 -с кылааһын үөрэнээччилэрэ. Эрсан Копырин «Сахам Сирэ сэриини баҕарбат», сэрии кэминээҕи ветераннар тустарыгар ахсаабат, утумнаах кыһамньы – биһиги мүлчүрүйбэт ытык иэспит буоларын туһунан А.П.Старков тылыгар, дьүрүлүгэр суруллубут «Умнуохпут Суоҕа» ырыаны Степан Петров эҕэрдэлээн ыллаатылар. Орто дойду олоҥхолоох олоҕун оҥкулун уурбут, хорсун-хоодуот санаалаах буойуттарга анаан «Үйэлэргэ Умнуллубаттар» бэйэтин тылыгар уонна дьүрүлүгэр ыллаата Лидия Егоровна Пестрякова — Үүнэр кыыһа Намыйа. Кыайыы митинэ саха буолан сандаарбыт, киһи буолан килбэйбит Кыайыыны уһансыбыт, хорсун-хоодуот буойуттарга анаммыт Уруй-Айхал «Кыайыы оһуохайынан» түмүктэннэ. Оһуохайы таһаарда Лидия Егоровна Пестрякова – Үүнэр кыыһа Намыйа.
Бу күн күнүс «Саллаат дьылҕата» диэн Д.Ф.Наумов суруйуутунан испиктээги нэһилиэкпит уус-уран самодеятельноһын кыттыылаахтара олус итэҕэтиилээхтик кѳрдѳрдүлэр.
Испиктээк кэнниттэн аҕам саастаахтарга «Күөх уот» музей дьиэҕэ буолла онтон тэрилтэлэр икки ардыларыгар «Кыайыы сүүрүүтэ» буолла.
Киэһээ 21ч.00 «Эйэлээх олох, дьол иһин!» — Кыайыы скверигэр кэриэстэбил чүмэчи ууруулунна.
Кыайыы умнуллубат! Умнубаттар тулаайах хаалбыт оҕолор! Умнубат сир Ийэ дойду!
Ким да умнуллубат, туох да умнуллубат! Бу сырдык бырааһынньык биһиги сурэхпитигэр,
өйбүтүгэр –санаабытыгар модун санаа кыайыытын туоһулуур, сэрии, тыыл бэтэрээннэригэр сүгүруйэр махтал күнэ. Биһиги аныгы кѳлүѳнэ, аҕа саастаах дьоммут холооно суох хорсун быһыыларын, хорутуулаах үлэлэрин умнубакка ѳйдүү — саныы сылдьар, киэн туттар, кѳлүѳнэттэн-кѳлүѳнэҕэ тиэрдэр ытык иэспит, кинилэр дьоһуннаах олохторун салҕыыр ытык эбээһинэспит.
