Муус устар 27 күнэ Сахабыт Өрөспүүбүлүкэтин күнэ, бу күн 1922 сыллаахха РСФСР президиумун постановлениятынан Саха АССР тэриллэн – Өрөспүүбүлүкэ күнүнэн биллэриллибитэ.
Бу күн биһиги нэһилиэкпитигэр Саха Өрөспүүбүлүкэтин күнүнэн «Уруйдан Сахам Сирэ!» диэн үөрүүлээх тэрээһиннэр ыытылыннылар. Ол курдук Кыайыы скверин болуоссатыгар нэһилиэк «Күбэйэ» дьахталлар түмсүүлэрин көҕүлээһининэн «Күүстээх Кэрэ 2026с» үс этаптаах бырайыак күрэх, бастакы этаба ыытылынна. Манна нэһилиэкпит тоҕус кэрэ аҥаардара кыттыыны ыллылар. Ол курдук: — хаптаһыны эрбээһин, тоһоҕо саайыы, маһы хайытыы, тэлиэгэҕэ оҕону олордон анньыы, сыалы быраҕыы, куулу көтөҕөн сүүрүү, ийэҕэ анаммыт ыһыллыбыт этии тылларын таһааран таайыы, күөгүнэн балык хаптарыы, финишка сүүрэн тиийии — бу барыта мүнүүтэҕэ ыытыллан күрэх түмүгүнэн:
3 миэстэ – Богатенкова Анастасия Семеновна, 2 миэстэ – Потапова Варвара Петровна, 1 миэстэ – Протопопова Мария Александровна кыайыылааҕынан тахсаннар мэдээлинэн, грамотанан наҕараадаланнылар. Кыттыбыт кэрэ аҥаардарга махтал сурук туттарылынна. Бу кэннэ «Уруйдан Сахам Сирэ!» диэн сахалыы эйгэлээх эҕэрдэ кэнсиэр буолан, Саха Өрөспүүбүлүкэтин күнэ — өрөгөй күнэ олус сэргэхтик ааста. Нэһилиэк олохтоохторо Саха сиригэр олорорбутунан бу күн уратытык тутуллан бэлиэтэнэриттэн киэн туттабыт.
