Муус устар 27 күнэ Сахабыт Өрөспүүбүлүкэтин күнэ. Бу күн 1922 сыллаахха РСФСР иһинэн Саха АССР тэриллибитэ. 1992 сыллаахха Саха автономиятын 70 сыллаах үөрүүлээх күнүгэр муус устар 27 күнэ – Өрөспүүбүлүкэ күнүнэн биллэриллибитэ. 1922 сыллаахха Саха норуотун чулуу уолаттара Максим Аммосов, Платон Ойуунускай, Степан Аржаков, Исидор Барахов, Алексей Кулаковскай, Василий Никифоров, Гаврил Ксенофонтов уонна да атыттар Саха Сирин автономиятын туоһулуур докумуоҥҥа илии баттанарын ситиспиттэрэ. Бу күнтэн ыла Саха Сирэ республика быһыытынан бэйэтин бас билэн сайдыы дохсуннук барбыта. Саха Өрөспүүбүлүкэтин күнүн чэрчитинэн Муус устар 26 күнүгэр Хомустаах 2-с нэһилиэгэр Саха Өрөспүүбүлүкэтин күнүгэр аналлаах түөлбэнэн «Саха буолан сандаар!» диэн толкуй оонньуута уонна саха төрүт үгэстэрин кэнчээри ыччакка үйэтитэр сыаллаах өбүгэ оонньуулара ыытылынна. Тэрээһиҥҥэ «Сайдам» уонна «Чагда» түөлбэ кытыннылар. «Чагда» түөлбэ тэҥнээҕин булбата, күрэх түмүгүнэн кыайыылааҕынан таҕыста. Кыайыылаах түөлбэ кубогынан уонна грамотанан наҕараадаланна.
