Кулун тутар 21 күнүгэр Нам улууһун 2- с Хомустааҕар Арассыыйаҕа «Аҕа дойдуну көмүскээччи», Саха өрөспүүбүлүкэтигэр «Ийэ дойдуну көмүскээччи», Нам улууһугар «Кыайыы сыла», биһиги нэһилиэккэ «Улуу кыайыы уонна көлүөнэ ситимнэрэ» сылларыгар аналлаах улуустааҕы нэһилиэктэр икки ардыларынан ыытыллар уус-уран самодеятельноһын көрүү фестивала бэрт долгутуулаахтык буолан ааста. Ол курдук Чурапчы көһөрүүтүн алдьархайа – бу бүттүүн саха омугун ыар алдьархайын, бу харах уулаах быһылаан историяҕа «Чурапчы алдьархайа» — диэн аатынан киирбитин туһунан «Былдьаммыт көҥүл» литературнай композициянан арылынна. Композицияны бэлэмнээн туруордулар – «Сэргэлэх» сынньалаҥ киинин уус-уран салайааччыта Иванова Мария Анатольевна, оҕо драм.куруһуогун салайааччыта Максимова Лена Андриановна, чтецтэри бэлэмнээтэ олохтоох библиотека салайааччыта Слепцова Лена Васильевна. Салгыы концертнай программа Улуу Кыайыы 80 сыллаах үбүлүөйүгэр аналлаах хордар, ырыалар, үҥкүүлэр толорулуннулар. «Сайылык оонньуулара» үҥкүүнү бэлэмнээтэ Е.П.Сивцев аатынан оскуола начаалынай кылаас учуутала Старкова Ульяна Андреевна. Хору, ансамбыллары бэлэмнээтэ Саха култууратын туйгуна Старков Андрей Петрович. Фольклорнай композицияны бэлэмнээн туруорда – «Сэргэлэх» сынньалаҥ киинин методиһа Попова Саргылана Семеновна. Дьүүллүүр сүбэҕэ кэлэн көрдүлэр: Саха Өрөспүүбүлүкэтин култууратын туйгуна, Афанасий Шестаков аатынан улуустааҕы норуот айымньытын дьиэтин режиссера — Новиков Иван Степанович; Нам улууһа муниципальнай тэриллии, култуураҕа уонна духуобунай сайдыыга сүрүннүүр исписэлииһэ – Орлова Сахайана Афанасьевна; Саха Өрөспүүбүлүкэтин култууратын туйгуна, Захар Порфирьевич Винокуров аатынан Намнааҕы оҕо искусствотын оскуолатын Хамаҕаттатааҕы филиалын фортепиано кылааһын преподавателя — Захарова Сардана Михайловна; Афанасий Шестаков аатынан улуустааҕы норуот айымньытын дьиэтин фольклорга специалиһа, «Нам кылыһах» төрүт дорҕоон бөлөҕүн салайааччыта — Григорьева Мария Степановна-Маайа; Афанасий Шестаков аатынан улуустааҕы норуот айымньытын дьиэтин «Ньургуһун» үҥкүү-хор народнай ансаамбылын балетмейстера — Винокуров Павел Архипович.
